【本故事純屬虛構，如有雷同，實屬不幸】
時間：清晨六時十分
地點：一張大床上
人物：左腦，右耳，婆婆
【開始時，婆婆在睡覺，可是從她的睡姿和身體反應顯示，她明顯睡得不好】
右耳：【在重覆地吸氣呼氣】嗚…呼…嗚…呼…嗚…呼….嗚…呼…嗚…呼…嗚…
左腦：【帶點無奈又不耐煩地說】 阿右耳妹妹，你咁早練抖氣呀，而家都係六點鐘咋噃，今日婆婆黃昏先出街，不如你再休息陣先啦…
右耳：【一邊說話還一邊吸氣呼氣】腦哥哥你有所不知，小妹練氣本當雞鳴即起。石屎森林那來雞鳴？唯有待見窗外曙光初現，即起來做早課。要不功夫疏懶，枉費了先前的努力，「吸音大法」難以大成。
左腦：【更不耐煩，但仍抑壓著 】你個咩「吸音大法」真係可以咁練到？婆婆話好似聽野無好到噃…咁點解你個孖生左耳妹妹又唔洗練氣既，仲係到借左聾耳陳隻耳咁，唔理三七廿一大覺瞓…右耳妹，你學下你妹妹啦，做人要輕鬆D 至得。今日係星期日，吊頸都要抖抖氣啦…
右耳：【仍然一邊說話還一邊吸氣呼氣】唉，腦哥哥，左耳妹就是被你寵壞了呢，我倆既為雙生兒，生來自是互補不足，理應共同進退，一起努力修練神功。可是妹妹生性頑劣，貪圖逸樂，已逐漸荒廢功夫…為姊真不知如何誘導她返回正途呢… 【 說著說著，聲音哽咽，呼吸越見急促 】…
左腦：【見她情緒激動，唯有先平服她的情緒】 哎呀，右耳妹你咪喊呀，喊醒婆婆就唔好啦…好好好，我唔講喇，你繼續練啦下… 【心想，真吹漲 】
右耳：【整理了一下情緒，又開始重覆地吸氣呼氣】 嗚…呼…嗚…呼…嗚…呼…嗚…呼…嗚…呼…嗚…
婆婆：【翻了個身，伸了個懶腰，帶點不滿地】左腦 ！ 【那邊廂右耳的練習沒有停過 】
左腦：【奇怪地，心想這麼早開工？婆婆你未醒噃，口裡卻答應著 】係婆婆，咩事呢。你今朝想諗個咩 topic 呢？
婆婆： 唉，左腦弟，我就係平時操得你太 Fit 喇，你家陣仲乜我都未叫你做野，你就自己搵野黎做呢？你好得閒咁話喇噃？得閒咪休息下囉 ！ 你同隻右耳蠢豬係度講咁耐，把鬼咩？佢有病嘛，你唔係唔知架啦…
左腦： 【委屈地 】咁我見頭先先岩岩六點多D，想婆婆瞓下添嘛…
婆婆： 左腦弟你真係叻過龍… 你唔同隻蠢豬講咁多，婆婆我都係忍下佢慢慢練氣嗟，你明知佢話都冇咁易就流馬尿架喇，搞搞下呢，收唔到科…… 拿拿拿，你聽下，佢同我係處呵車呵車緊喇…… 【果然右耳由練氣變成在唱呵車，像大戲練聲般】
左腦： 【痛苦地 】 對唔住呀，婆婆，我真係唔想咁架…
婆婆： 總之唔該你以後唔好同我自把自為，我未叫你做野你同我坐定定唔好開聲…
左腦： 係婆婆…【心裡想：我學電腦咁可以 power off 就好啦，唔洗心思思去幫婆婆打點一切…】 咁今朝洗唔洗開工呀？
婆婆：…唔…唔洗喇…星期日，安息日，唔 x 諗野喇 … 【然後起身去廁所 】
陽光照著床頭的鬧鐘滴答滴答的響。時間為六時二十五分。
~~~~ 完 ~~~~~
沒有留言:
發佈留言